میں کسی کام سے گھر سے باہر نکلا ہی تھا کہ موبائل فون بجنے لگا۔ نکال کے دیکھا تو عنبر کی کال۔
“یہ تو اس وقت یونیورسٹی میں ہوگی۔۔۔ کیا کام پڑگیا اسے۔۔۔!!” 
میں سوچنے لگا۔ حسبِ معمول اس کی کال کاٹ کر خود کال کی ورنہ اس نے بعد میں کریڈٹ ختم ہونے کا رونا رونا تھا۔
“السلام علیکم”۔
“السلام علیکم”۔
عادت سے مجبور، ہم دونوں نے ایک ساتھ سلام میں پہل کی۔
“میں نے سلام کیا، جواب دو نا۔۔۔” عنبر کا شکوہ۔ 
“میں نے بھی تو سلام کیا نا۔۔۔ تم دو جواب۔” یہاں میری ضد.
“لیکن پہلے میں نے سلام کیا تھا”۔ دوسری جانب سے دعویٰ ہوا۔
“اچھا بھئی۔۔۔ 
وعلیکم السلام۔”
“وعلیکم السلام۔۔۔”
دونوں طرف سے سلام کا جواب ادا کردیا گیا۔
“مجھ سے لڑا نہیں کرو۔۔۔” 
عنبر نے مصنوعی شکوہ کیا۔ میں ہنس کر رہ گیا۔۔۔ شکوے شکایات کا ایسا سلسلہ ہر کچھ دن بعد شروع ہوکر فورا ہی جھاگ کی طرح بیٹھ جاتا ہے۔
“کہو۔۔۔ کس لیے فون کررہی تھیں؟” میں اسے اصل موضوع پر لایا۔
“ہاں۔۔۔ یاد آیا۔۔۔ عارم! یونیورسٹی آسکتے ہو؟”
“یونیورسٹی۔۔۔۔؟؟ 
کیوں عنبر؟ خیریت؟” میں اچنبھے میں پڑگیا۔
“ہاں۔۔۔ میری چھٹی کے وقت آجانا۔ کچھ کام ہے۔”
“کوئی خاص بات۔۔۔؟؟؟” میری تفتیش جاری تھی۔
“بھئی آجانا نا۔۔۔ کیا ہےےےےے۔۔۔۔؟؟؟” 
“ہممم۔۔۔۔ 
ٹھیک ہے چلو، میں دیکھتا ہوں۔”
“دیکھنا ویکھنا نہیں… آنا ہے…”
“اچھا نا بھئی….. آتا ہوں.”
“ٹھیک ہے۔ اللہ حافظ”۔
“ہمم۔۔۔ اپنا خیال رکھنا۔ اللہ حافظ۔”
جب تک یونیورسٹی پہنچا نہیں تب تک سارا وقت یہی سوچتا رہا کہ کیا ضرورت پڑگئی اسے آج۔۔۔ یونیورسٹی پہنچا تو وہ آگئی۔۔۔ ساتھ میں کچھ دوسری لڑکیاں بھی تھیں۔۔۔ ان میں سے ایک نابینا طالبہ تھی۔
“عارم! یہ ہے میری ہم جماعت۔۔۔ ثمرین”۔ عنبر نے اس نابینا طالبہ کا تعارف کروایا۔ “اسے کچھ کام ہے۔”
مجھ سے؟؟؟ آپ نے میری پبلسٹی کی ہوئی ہے یہاں؟” 
میں نے اسے گھورا۔ عنبر نے 
کے سوا کچھ نہ کہا۔
“السلام علیکم۔ جی بولیں!” میں اس طالبہ کی طرف متوجہ ہوا۔
“وعلیکم السلام۔۔۔ بھائی! کیسے ہیں آپ؟”
“میں ٹھیک ہوں بہن. آپ بتایئے، کیا بات ہے؟”
“بھائی! میں بہت پریشان ہوں۔ پلیز آپ میری کچھ مدد کردیں۔” ثمرین نے متلجیانہ انداز میں کہا۔
“جی جی۔۔۔ بولیں۔۔۔ کیا بات ہے؟” میں نے مسئلہ پوچھا۔
“بھائی! میں نے کچھ دن پہلے اپنی ایک دوست کا موبائل نمبر لیا تھا لیکن وہ محفوظ کرنے میں کچھ غلط ہوگیا۔ اگلے دن جب میں نے اپنی دوست کو فون کرنا چاہا تو وہاں سے کسی اور نے اٹھایا اور مجھے اندازہ ہوا کہ کچھ غلطی ہوگئی ہے۔ میں نے جلدی سے فون بند تو کردیا لیکن اب مسلسل میرے پاس انجانے نمبرز سے فون کالز آرہی ہیں۔ مجھے کچھ سمجھ نہیں آرہا. میرے گھر کا ماحول بہت سخت ہے. بہت مسئلہ ہوجائے گا. میں نے اپنا فون سائلنٹ پر رکھا ہوا ہے… کیا کروں میں؟” 
ثمرین نے پریشان لہجے میں کہا.
“ہمم….” میں کوئی حل سوچنے لگا. “میں کیا کرسکتا ہوں؟ اگر آپ مجھے وہ نمبرز دیدیں جو آپ کو تنگ کررہے ہیں تو میں بات کرکے دیکھتا ہوں. شاید کوئی حل نکل آئے.” مجھے جلدی میں یہی سمجھ آیا.
“جی… وہ میں نمبر آپ کو دے دیتی ہوں…” یہ کہہ کر ثمرین نے اپنے موبائل فون میں مسڈ کالز کی فہرست کھول کر میرے سامنے کردی. میں نے اُس سے پوچھ کر وہ دو نمبرز نوٹ کرلیے.
“آپ میرے ساتھ چلنا پسند فرمائیں گی؟” میں نے اس کاروائی سے فارغ ہوکر عنبر سے پوچھا.
“مجھے تھوڑا کام ہے. کچھ وقت لگ جائے گا.” میں نے سوچا کہ جب تک عنبر اپنے کام نمٹالے، میں ذرا ان فون نمبرز پر بات کرکے دیکھوں.
میں نے پہلے نمبر پر جب بات کی تو اس نے پہلے ماننے سے انکار کیا. پھر جب میں نے سختی کی تو تمسخرانہ لہجے میں کہنے لگا، “آپ مجھے وہ نمبر دیدیں، میں اسے تنگ نہیں کروں گا”. 
دوسرے نمبر پر کوئی قدرے مناسب بندہ تھا. اس نے تمیز سے میری بات سنی. میں نے دونوں ہی کو بتایا کہ آپ جسے تنگ کررہے ہیں، وہ بے چاری ایک نابینا لڑکی ہے، اس کے گھر کے الگ مسائل ہیں اور وہ آپ کی اس حرکت کی وجہ سے کافی پریشان ہے.
مجھے بعد میں یہ جان کر سکون ملا کہ ان نمبرز نے ثمرین کو تنگ کرنا بند کردیا لیکن ایسے واقعات کی نوبت ہی کیوں آتی ہے؟ اور کس کس سے کیا کیا غلطی ہوتی ہے؟ ان سوالات پر کبھی غور کیا ہے؟ نہیں، ہم تو بہت مصروف رہتے ہیں. ہم اتنے فضول سوالات پر غور کریں گے؟ ہونہہ!
June 06, 2009 | صدائے عارم | 4 تبصرے »
شاہ جی بہت دن سے فون کررہے تھے اور گھر آکر ملنا چاہتے تھے لیکن مجھے فرصت کے لمحات ہی میسر نہیں آرہے تھے۔ ہر بار میں احساسِ شرمندگی کے ساتھ انہیں ٹالتا رہتا۔ آخر ایک دن تہیہ کیا کہ خود ہی ان کے گھر جاکر ملاقات کر آؤں۔ پہلے ہی فون کرکے انہیں آگاہ کردیا تھا۔ گھر پہنچا تو ہمیشہ کی طرح شاہ جی بہت گرمجوشی سے ملے۔ ان کے بیٹوں نے بھی آکر سلام کیا۔ پھر وہ مجھے اپنے کمرے میں لے آئے۔ ادھر ادھر کی رسمی باتوں کے بعد کہنے لگے، عارم! میں تم سے کچھ بات کرنا چاہتا ہوں۔ شاہ جی پریشان تھے، اس کا اندازہ تو مجھے ان سے فون پر بات کرکے ہی ہوگیا تھا۔ میں ان کے تھوڑا قریب ہوا۔ کچھ توقف کے بعد بولے، یار میرا بڑا بیٹا کچھ ضدی ہوگیا ہے، بات بے بات بحث کرتا ہے، کچھ سمجھ نہیں آرہا۔ مجھے یہ سن کر اچنبھا ہوا۔ شاہ جی کا بڑا بیٹا ارمان بہت خوش مزاج اور بااخلاق لڑکا تھا۔ میں نے ان سے کہا کہ ارمان سے بات کرکے ہی کچھ اندازہ ہوسکتا ہے، میں اس سے بات کرکے دیکھتا ہوں۔ یہ کہہ کر کمرے سے باہر نکل آیا۔ ارمان ٹی۔وی لاؤنج میں بیٹھا ٹی۔وی کھولے چینل بدل رہا تھا۔ میں اس کے برابر میں جا بیٹھا۔ وہ مجھے دیکھ کر مسکرایا اور حال پوچھا۔ میں اس کی پڑھائی کے بارے میں سوال کرنے لگا۔ مجھے وہ ویسا ہی خوش اخلاق ارمان دکھائی دیا۔ میں شاہ جی کے شکوہ کی حقیقت تلاش کرنے لگا لیکن ایسے کوئی آثار نظر نہیں آئے۔ تب میں اٹھنے کا سوچ ہی رہا تھا کہ ارمان کے چھوٹے بھائی سلمان نے آکر اس سے کچھ کہا جس پر ارمان نے انتہائی روکھے لہجے اور تیز آواز میں جواب دیا۔ سلمان منہ بناکر چلا گیا اور میں نے اٹھنے کا ارادہ بدل دیا۔
تھوڑی دیر خاموشی چھائی رہی۔ میں نے ایک لمبی سانس لے کر بات دوبارہ شروع کی: کیا ہوا ارمان؟ اتنا غصہ سلمان پر؟ ارمان تھوڑا جھینپ سا گیا۔ میں نے اس کے کاندھے پر ہاتھ رکھ دیا۔
“آپ کو پتا ہے بھائی، یہ بہت بدتمیز ہوگیا ہے۔ ہر وقت تنگ کرتا رہتا ہے۔ ادب احترام کچھ نہیں، سب بھول گیا ہے۔” ارمان نے شکوہ کیا۔
“لیکن وجہ کیا ہے؟ اتنا اچھا تو ہے سلمان۔”
“ہے نہیں، تھا۔ ابو کے بے جا لاڈ پیار نے اسے بگاڑ دیا ہے۔” ارمان نے جلد ہی اپنے دل کی بات بتادی۔
“غلط بات، ارمان! تمہارے ابو تم دونوں کو برابر چاہتے ہیں۔”
“نہیں۔۔۔ میں بھی ایسا ہی سمجھتا تھا لیکن ایسا نہیں ہے۔ جن باتوں پر مجھے ڈانٹا جاتا تھا، ان باتوں پر اس کی طرف داری کی جاتی ہے۔ اوپر سے میں اگر اسے کچھ کہوں تو مجھے ہی ڈانٹ دیا جاتا ہے کہ ہر وقت کچھ نہ کچھ کہتا رہتا ہوں۔ چھوٹا ہے۔” ارمان کی آواز بھرا گئی۔ اس نے آنکھیں مسل کر آنسو چھپالیے۔
میں نے ارمان کی بات سن کر اس کو تھپکی دی اور زیرِ لب مسکرایا۔ اس کا شکوہ بجا تھا۔ میں نے خود شاہ جی کا ایسا رویہ دیکھا تھا لیکن تب اتنا دھیان نہیں دیا تھا اور نہ ہی خیال آیا تھا کہ اس کا ردِ عمل ایسا بھی ہوسکتا ہے۔
میں نے ارمان کو رسمی سی نصیحتیں کیں، تھوڑا وقت ادھر ادھر کی باتیں کرکے اس کو بہلایا اور پھر اٹھ کر شاہ جی کے پاس آگیا۔
شاہ جی کو جو سمجھایا، سو سمجھایا لیکن آپ کیا سمجھے؟ بظاہر ایسے واقعات من گھڑت لگتے ہیں اور شاید آپ نے اس جیسی کہانیاں پہلے بھی سن رکھی ہوں لیکن یقین جانئے، یہ حقیقت سے تعلق رکھتی ہیں۔ میں یہ نہیں کہتا کہ والدین دانستہ ایسا رویہ اختیار کرتے ہیں۔ ظاہر ہے، ایسا غیر ارادی طور پر ہوتا ہے لیکن اس کے نتائج سخت بھی نکل سکتے ہیں۔ نوجوانی میں جذبات بھڑکے ہوئے اور خون گرم ہوتا ہے۔ بچے ایسی باتوں کا برا اثر لیتے ہیں اور بغاوت پر اتر آتے ہیں۔ جنہیں ذرا بری صحبت میسر آجائے وہ گھروں سے بھاگ جاتے ہیں یا انہیں کسی نشے کی لت لگ جاتی ہے۔ دو بھائیوں یا بھائی، بہنوں کے دلوں میں ایک دوسرے کے خلاف رنجش، کدورت، بغض اور حسد جیسے جذبات جنم لیتے ہیں جو وقت گزرنے کے ساتھ ساتھ بڑھتے جاتے ہیں۔ انہی کا نتیجہ کبھی شدید لڑائی کی صورت میں نکلتا ہے اور کبھی ترکِ تعلق کی شکل میں۔ اپنے تمام بچوں سے برابر کا پیار کریں اور صرف دل میں نہ رکھیں، بلکہ اس کا اظہار بھی ضرور کریں۔ آپ کے خاندان کو مضبوط بندھن میں رکھنے کے لیے یہ بے حد ضروری ہے۔
January 15, 2009 | صدائے عارم | 3 تبصرے »
یہاں ایک صاحب سے ہماری جان پہچان ہے۔ کافی عمر رہی ہوگی، بڑھاپے کے دور سے گزر رہے ہیں۔ نام تو ان کا کچھ اور ہے پر انہیں عرف عام حاجی صاحب کہا جاتا ہے۔ اچھا خاصا کاروبار ہے، گھر میں زیادہ افراد نہیں لیکن مال و دولت کی ہوس اس قدر کہ حیرت ہو۔
چند ماہ پہلے ان کی والدہ انتقال کرگئیں۔ ورثہ میں خاصی دولت اور جائیدار چھوڑ گئیں۔ جب وراثت کی تقسیم کا وقت آیا تو طے تھا کہ شرعی حساب سے بہنوں کو ایک حصہ اور بھائیوں کو دو حصے ملیں گے۔ لیکن ان کی ایک بہن نے دعوی کیا کہ والدہ نے اپنی زندگی میں انہیں ایک بار کہا تھا کہ تمام بھائی بہنوں کو برابر حصہ ملے لہذا اسی حساب سے تقسیم کی جائے۔ یہ سن کر تو جناب کے ہوش اڑ گئے۔ حساب لگایا تو پتا چلا کہ برابر کی تقسیم سے انہیں کئی لاکھ کا نقصان ہوجائے گا۔ اب اپنی بہن سے کہیں کہ گواہ لاؤ، کوئی دوسرا بھی قریب تھا اس وقت؟ وہ کہے کہ نہیں، صرف مجھے تنہائی میں کہا تھا۔ آرام سے ہاتھ آئی دولت یوں قربان کردینے کو ان کا دل نہ چاہے۔ اب فتوے منگواتے پھرے کہ ہماری والدہ اتنا ورثہ پیچھے چھوڑ گئی ہیں، تقسیم کے وقت ایک بہن نے ایسا ایسا دعوی کیا ہے، کیا ہم پر شرعی حساب سے ایسا کرنا لازم ہے؟
فتوی ظاہر ہے یہی تھا کہ شرعی اعتبار سے وصیت کے مطابق احکامات بجا لانا ضروری نہیں۔ اب جو انہوں نے اپنی بہنوں کو یہ فتوے دیکھائے تو وہ کہنے لگیں کہ اچھا، اگر ویسے ضروری نہیں تو آپ سب بھائی اپنی خوشی سے ہی برابر تقسیم کردو۔ اب نہ اگلتے بنے نہ نگلتے، مجبورا رشتوں کا پاس رکھنے کے لیے مروت میں برابر برابر کی تقسیم کی۔ بعد میں ساری دنیا سے اپنے اس غم کا ڈھنڈورا پیٹتے پھرے کہ میں تو اتنا غریب ہوں، میری بہنوں نے ایسا کہہ دیا تقسیم کے وقت، مجبوری تھی، دینا پڑا۔۔۔ وغیرہ وغیرہ۔۔۔!
مجھے بے حد حیرانی ہوئی کہ انسان دولت کے نشے میں اتنا اندھا ہوجاتا ہے کہ اس کے لیے اپنے رشتوں سے زیادہ اہم دولت ہوجاتی ہے؟ حاجی صاحب اور ان کے بھائیوں نے اپنی بہنوں کو جائیداد میں برابر حصہ دیا تو سہی، لیکن جس دل سے دیا اس کا فائدہ؟
January 15, 2009 | صدائے عارم | ایک تبصرہ »
مجھے صورتحال کی سنگینی کا اندازہ فون پر عبیر کی ہچکیاں سن کر ہوا ورنہ میں تو اتنی دیر سے ہاں، ہوں ہی کیے جارہا تھا۔ ایک تو جب اس کی فون کال آئی تھی تب میں تقریبا نیند میں جاچکا تھا۔ اگرچہ ایسی کالز آنا میرے لیے کوئی نئی بات نہیں اور مجھے پریشان لوگوں کی بڑھانے اور انہیں حوصلہ دینے پر دلی خوشی کا احساس ہوتا ہے لیکن کبھی کبھی نیند کی حالت میں، میں خود ٹھیک سے صورتحال کا اندازہ نہیں کرپاتا۔
عبیر کا کوئی بھائی نہیں، بہنوں میں بھی سب سے بڑی ہے۔ ہماری نسل میں اولاد اور والدین کے درمیان فاصلہ بھی بہت زیادہ دیکھنے کو ملتا ہے جس کے سبب بچے، والدین سے اپنے مسائل اور پریشانیاں کہتے ہوئے ہچکچاتے ہیں اور اپنے ذہنی دباؤ سے نجات حاصل کرنے کے لیے متبادل راستہ اپناتے ہیں۔۔۔ یہی سب کچھ عبیر کی بھی کہانی ہے۔
عبیر کا فون آیا تو کچھ ادھر ادھر کی باتوں کے بعد بولی:
“آج بہت برا ہوا۔ میں آج بہت تلخ تجربے سے گزری ہوں۔۔۔”
“کیوں؟ کیا ہوا۔۔۔۔ سب خیریت؟” میرے سوال کی جواب میں اس نے اپنی بپتا سنائی۔
“میں آج صبح جب یونیورسٹی جانے کے لیے نکلی تو گاڑیاں ہی نہیں آرہی تھیں۔ جو اتنی دیر بعد آتی تو اس قدر بھری ہوتی کہ چڑھنے کی جگہ ہی نہیں ہوتی۔ کافی انتظار کے بعد ایک گاڑی آئی تو اس میں مجھے پائیدان پر کھڑے ہونے کی جگہ مل سکی جہاں کنڈیکٹر کھڑا ہوتا ہے۔” اس نے اتنا کہہ کر کچھ توقف کیا۔ شاید مناسب الفاظ ڈھونڈنے کے لیے۔
“عورتوں کے کمپارٹمنٹ میں بھی مرد کھڑے ہوئے تھے۔ کنڈیکٹر آیا تو مجھے کہنے لگا کہ اندر کی طرف ہوجاؤ۔ لیکن میں وہاں کیسے ہوتی؟ اتنے مرد جو کھڑے تھے اور اگر میں وہاں کھڑی ہوجاتی تو مجھے ان کے ساتھ لگ کر کھڑا ہونا پڑتا۔۔۔ میں نے کنڈیکٹر کو منع کردیا۔ ایک خاتون کہنے بھی لگیں کہ مردوں کو پیچھے کرو تو لڑکیاں کھڑی ہوسکیں گی نا لیکن کسی کے کان پر جوں نہ رینگی۔ یہاں تک کہ وہ سب مرد بھی ڈھیٹ بنے کھڑے رہے۔ اگلے اسٹاپ سے چند اور لڑکیاں بھی بس میں چڑھ آئیں۔ جگہ نہیں تھی، مجبورا مجھے اندر کی طرف ہونا پڑا۔ اور۔۔۔۔ اور پھر۔۔۔۔” اس کی آواز رندھ گئی۔ میں اندازہ کرسکتا تھا کہ پھر کسی نے کوئی چھیڑ چھاڑ کی ہوگی۔
“اچھا بس۔۔۔ روتے نہیں ہیں عبیر۔۔۔ پتا نہیں کیا ہوگا ہماری اس قوم کا۔۔۔ بہت بے حس ہوگئی ہے۔۔۔” میں نے اسے دلاسا دیتے ہوئے خود کو بے بس محسوس کیا۔
“پاپا تو گھر پر ہوتے ہیں نا صبح؟ ان سے کہہ دیا کرو کہ یونیورسٹی تک چھوڑ دیں۔ واپسی میں تو آرام سے مل ہی جاتی ہے گاڑی۔۔۔” میں نے اسے مشورہ دیا۔
“نہیں نا۔۔۔ پاپا بہت تھکے ہوتے ہیں اور صبح سورہے ہوتے ہیں۔۔۔ اچھا نہیں لگتا ان کو جگانا۔۔۔ پھر دن بھر انہیں مصروف رہنا ہوتا ہے۔۔۔”
والدین سے عبیر کی اس درجہ محبت اور خیال دیکھ کر مجھے ایک عجیب سا احساس ہوا۔ پھر وہ کہنے لگی:
“اور پتا نہیں، لڑکوں اور مردوں کو بس گھورنا ہوتا ہے۔۔۔ چاہے ہم نے نقاب ہی کیا ہوا، عبایا بھی پہنا ہو لیکن یہ گھورنے سے باز نہیں آتے۔۔۔ اتنی نظریں اپنے اندر چبھتی ہوئی محسوس ہوتی ہیں مگر میں تو کچھ کر بھی نہیں سکتی۔ مجھے تو کچھ بولنا بھی نہیں آتا۔”
میں اسے حوصلہ دینے کے لیے پتا نہیں کیا کیا باتیں کرتا رہا، کس کس طرح اسے ہمت سے ان سب چیزوں کا مقابلہ کرنے کے کہا لیکن ساتھ میرا ذہن جتنا سوچتا گیا، الجھتا گیا۔
ہم عورتوں کو برابر کے حقوق دینے کی بات کرتے ہیں، مساوات کا نعرہ لگاتے ہیں لیکن حقیقی دنیا میں ہمارا رویہ کیا ہے؟ برابری تو دور، عورتوں کے لیے جہاں ہم نے کوٹہ مقرر کیا ہے، ہم تو وہ کوٹہ بھی انہیں نہیں دیتے۔۔۔ اتنے بے شرم، بے غیرت ہوگئے ہیں؟ ہماری اپنی عورتوں کے ساتھ کچھ برا ہو تو غیرت کے نام پر انہیں قتل کرڈالیں اور دوسروں کی عورتیں ہوں تو غیرت کا جنازہ نکال دیں؟
کچھ تو شرم کریں۔
January 15, 2009 | صدائے عارم | 2 تبصرے »
بھیک
میں ابھی کمپیوٹر کھول کر کچھ لکھنے کے لیے خود کو تیار کر ہی رہا تھا کہ دروازے پر دستک ہوئی۔ اٹھ کر ابھی دروازے تک پہنچا ہی تھا کہ اطلاعی گھنٹی (کال بیل) چینخنے لگی۔ میں نے لپک کر دروازہ کھولا۔ باہر محلے کی ایک چھوٹی بچی کھڑی تھی۔ بولی، ٹماٹر ہوں گے؟ میں نے فریج میں جھانکا، صرف دو نظر آئے، ایک اسے تھمادیا۔ کہتی ہے، زیادہ چاہئیں۔ دوسرا بھی پکڑا دیا اور کہا کہ بس یہی ہیں۔ چلی گئی۔
میں نے ایک گلاس ٹھنڈا پانی پیا اور واپس اپنی کرسی پر آبیٹھا۔ خیالات مجتمع کررہا تھا کہ موبائل فون کی گھنٹی بجی۔ ٹیکسٹ آیا تھا۔ لکھا تھا کہ “میں بہت بیمار ہوں، ہسپتال میں داخل ہوں، پلیز مجھے اس نمبر پر بیس روپے ٹرانسفر کردیں۔” میرا منہ بن گیا۔ موبائل ایک طرف پٹخ دیا (نوکیا کے موبائل فون سیٹ کافی مضبوط ہوتے ہیں نا)۔ ایسے ٹیکسٹ اکثر آتے رہتے ہیں۔
مجھے پبلک ٹرانسپورٹ میں بھیک مانگنے والے چند ایسے بھکاری یاد آنے لگے جن کے بھیک مانگنے کا انداز بہت دلچسپ تھا۔ ایک بھکاری گاڑی میں چڑھ کر آواز لگاتا تھا بلکہ آواز کیا لگاتا تھا، چینخا ہی کرتا تھا کہ “ایک روپیہ دیدو، روٹی کھاؤں گا۔ ایک روپیہ دیدو، روٹی کھاؤں گا۔” حلیہ اس قدر غلیظ ہوتا تھا کہ گھن آئے۔ ایک اور بھکاری تھا جو مجھے کئی بار نظر آیا اور وہ ہر بار یہی کہانی سناتا تھا کہ “میں فلاں کمپنی کے پاس بیٹھتا ہوں، رنگ کرنے والا ہوں، کبھی دیہاڑی لگ جاتی ہے کبھی نہیں۔ تین، چار دن سے بالکل بیکار ہوں۔ ہٹاکٹا ہوں، بھیک نہیں مانگتا، اللہ کے نام پر سوال کرتا ہوں۔ میرے بچوں کے کھانے پینے کے لیے پیسے دیدو۔” سچ کہوں تو مجھے ایسے بھیک مانگنے والوں سے زیادہ غصہ ان لوگوں پر آتا تھا جو انہیں بھیک دیدیتے تھے۔ پر، انہیں گھورنے کے سوا کچھ نہیں کیا جاسکتا۔
انہی سوچوں میں غلطاں تھا کہ اطلاعی گھنٹی پھر سے چینخی۔ جھنجھلا کر اٹھا اور دروازہ کھولا۔ پھر وہی بچی کھڑی تھی۔ کہتی ہے، گرائنڈ مشین چاہئے۔ سخت غصہ آیا۔ میں آج تک نہیں جان سکا کہ یہ لڑکی کس گھر سے آتی ہے، بس آتی ہے اور چیزیں لے جاتی ہے، واپس کرنے والی ہوں تو کرجاتی ہے۔ معمول ہے اس کا۔ اللہ جانے کیسے گھر والے ہیں۔ میں جانتا تھا کہ میں نے اگر مشین دی تو ماما سے ڈانٹ بھی پڑ سکتی ہے لیکن بہرحال! مجھے انکار کرنا اور انکار سننا بالکل پسند نہیں۔ میں نے اسے گرائنڈ مشین تھمادی۔ وہ چلی گئ۔ دروازہ بند کرکے میں ٹی۔وی لاؤنج کی طرف آگیا۔
میں یہ سوچ رہا تھا کہ ایک معاشرہ میں کس قدر مختلف مزاج کے لوگ پائے جاتے ہیں۔ تربیت، ماحول اور صحبت کا کتنا زیادہ اثر ہوتا ہے۔ مجھے یاد پڑتا ہے کہ میرے لیے کسی سے کچھ مانگنا ہمیشہ سے انتہائی مشکل کام رہا ہے، چاہے اپنی ہی چیز کیوں نہ ہو۔ دوستوں کے مانگنے پر انہیں اپنی چیزیں دے تو دیتا تھا لیکن ان چیزوں کی واپسی کا سوال مجھے شرمندگی کا احساس دلاتا اور نتیجہ یہ نکلتا کہ اگر دوست واپس نہ کرتے تو میں بھی مانگ نہ پاتا اور وہ چیزیں انہی کے پاس رہ جاتیں۔ اور ہاں۔۔۔ لفٹ مانگنا۔۔۔ اکثر لوگ راہ چلتے کسی گاڑی والے سے کچھ راستہ کے لیے لفٹ لے لیتے ہیں لیکن مجھ سے یہ کام کبھی نہیں ہوسکا۔ کبھی بھی نہیں۔۔۔ کبھی ضرورت پڑتی بھی تو میں بس سوچتا ہی رہتا کہ ہاں، اب جو گاڑی آئے گی، اس کو اشارہ کروں گا لفٹ کے لیے لیکن نہ کرپاتا۔۔۔ ایک، دو بار نہیں، بیسیوں بار یہ تجربہ کرکے دیکھا۔ کسی سے کچھ مانگنا۔۔۔ کسی اپنے جیسے سے کچھ مانگنا بہت برا لگتا ہے نا! اور ہے بھی غلط۔۔۔ شاید لفٹ لینے کی حد تک تو چل ہی جاتا ہو لیکن چھوٹی چھوٹی چیزیں دوسروں سے مانگنا، دوسروں کی چیزوں پر انحصار کرنا، یہ بالکل بھی اچھی عادت نہیں۔
میں نے یہی سوچتے سوچتے ٹی۔وی کھول لیا۔ خبر آرہی تھی:
امریکی کانگریس میں پاکستان کے لیے ساڑھے سات ارب ڈالر کی امداد کا بل پیش کردیا گیا۔
پھر خبر آنے لگی: یورپی یونین نے صوبائی محکمہ تعلیم کی روکی جانے والی 39 ملین یورو کی امداد بحال کردی ہے۔
امداد۔۔۔ قرضہ۔۔۔ خیرات۔۔۔ بھیک۔۔۔ ہونہہ۔۔۔ جس قوم کو اوپر سے لے کر نیچے تک بھیک کا سہارا ہو، اس میں چھوٹے چھوٹے بھکاریوں کا کیا قصور۔۔۔؟ میں نے غصہ میں ٹی۔وی بند کردیا۔
۔۔۔۔۔۔۔۔۔
پاکستان قرضہ گوگل کیا کہتا ہے؟
January 15, 2009 | صدائے عارم | 3 تبصرے »
میں ابھی کمپیوٹر کھول کر کچھ لکھنے کے لیے خود کو تیار کر ہی رہا تھا کہ دروازے پر دستک ہوئی۔ اٹھ کر ابھی دروازے تک پہنچا ہی تھا کہ اطلاعی گھنٹی (کال بیل) چینخنے لگی۔ میں نے لپک کر دروازہ کھولا۔ باہر محلے کی ایک چھوٹی بچی کھڑی تھی۔ بولی، ٹماٹر ہوں گے؟ میں نے فریج میں جھانکا، صرف دو نظر آئے، ایک اسے تھمادیا۔ کہتی ہے، زیادہ چاہئیں۔ دوسرا بھی پکڑا دیا اور کہا کہ بس یہی ہیں۔ چلی گئی۔
میں نے ایک گلاس ٹھنڈا پانی پیا اور واپس اپنی کرسی پر آبیٹھا۔ خیالات مجتمع کررہا تھا کہ موبائل فون کی گھنٹی بجی۔ ٹیکسٹ آیا تھا۔ لکھا تھا کہ “میں بہت بیمار ہوں، ہسپتال میں داخل ہوں، پلیز مجھے اس نمبر پر بیس روپے ٹرانسفر کردیں۔” میرا منہ بن گیا۔ موبائل ایک طرف پٹخ دیا (نوکیا کے موبائل فون سیٹ کافی مضبوط ہوتے ہیں نا)۔ ایسے ٹیکسٹ اکثر آتے رہتے ہیں۔
مجھے پبلک ٹرانسپورٹ میں بھیک مانگنے والے چند ایسے بھکاری یاد آنے لگے جن کے بھیک مانگنے کا انداز بہت دلچسپ تھا۔ ایک بھکاری گاڑی میں چڑھ کر آواز لگاتا تھا بلکہ آواز کیا لگاتا تھا، چینخا ہی کرتا تھا کہ “ایک روپیہ دیدو، روٹی کھاؤں گا۔ ایک روپیہ دیدو، روٹی کھاؤں گا۔” حلیہ اس قدر غلیظ ہوتا تھا کہ گھن آئے۔ ایک اور بھکاری تھا جو مجھے کئی بار نظر آیا اور وہ ہر بار یہی کہانی سناتا تھا کہ “میں فلاں کمپنی کے پاس بیٹھتا ہوں، رنگ کرنے والا ہوں، کبھی دیہاڑی لگ جاتی ہے کبھی نہیں۔ تین، چار دن سے بالکل بیکار ہوں۔ ہٹاکٹا ہوں، بھیک نہیں مانگتا، اللہ کے نام پر سوال کرتا ہوں۔ میرے بچوں کے کھانے پینے کے لیے پیسے دیدو۔” سچ کہوں تو مجھے ایسے بھیک مانگنے والوں سے زیادہ غصہ ان لوگوں پر آتا تھا جو انہیں بھیک دیدیتے تھے۔ پر، انہیں گھورنے کے سوا کچھ نہیں کیا جاسکتا۔
انہی سوچوں میں غلطاں تھا کہ اطلاعی گھنٹی پھر سے چینخی۔ جھنجھلا کر اٹھا اور دروازہ کھولا۔ پھر وہی بچی کھڑی تھی۔ کہتی ہے، گرائنڈ مشین چاہئے۔ سخت غصہ آیا۔ میں آج تک نہیں جان سکا کہ یہ لڑکی کس گھر سے آتی ہے، بس آتی ہے اور چیزیں لے جاتی ہے، واپس کرنے والی ہوں تو کرجاتی ہے۔ معمول ہے اس کا۔ اللہ جانے کیسے گھر والے ہیں۔ میں جانتا تھا کہ میں نے اگر مشین دی تو ماما سے ڈانٹ بھی پڑ سکتی ہے لیکن بہرحال! مجھے انکار کرنا اور انکار سننا بالکل پسند نہیں۔ میں نے اسے گرائنڈ مشین تھمادی۔ وہ چلی گئ۔ دروازہ بند کرکے میں ٹی۔وی لاؤنج کی طرف آگیا۔
میں یہ سوچ رہا تھا کہ ایک معاشرہ میں کس قدر مختلف مزاج کے لوگ پائے جاتے ہیں۔ تربیت، ماحول اور صحبت کا کتنا زیادہ اثر ہوتا ہے۔ مجھے یاد پڑتا ہے کہ میرے لیے کسی سے کچھ مانگنا ہمیشہ سے انتہائی مشکل کام رہا ہے، چاہے اپنی ہی چیز کیوں نہ ہو۔ دوستوں کے مانگنے پر انہیں اپنی چیزیں دے تو دیتا تھا لیکن ان چیزوں کی واپسی کا سوال مجھے شرمندگی کا احساس دلاتا اور نتیجہ یہ نکلتا کہ اگر دوست واپس نہ کرتے تو میں بھی مانگ نہ پاتا اور وہ چیزیں انہی کے پاس رہ جاتیں۔ اور ہاں۔۔۔ لفٹ مانگنا۔۔۔ اکثر لوگ راہ چلتے کسی گاڑی والے سے کچھ راستہ کے لیے لفٹ لے لیتے ہیں لیکن مجھ سے یہ کام کبھی نہیں ہوسکا۔ کبھی بھی نہیں۔۔۔ کبھی ضرورت پڑتی بھی تو میں بس سوچتا ہی رہتا کہ ہاں، اب جو گاڑی آئے گی، اس کو اشارہ کروں گا لفٹ کے لیے لیکن نہ کرپاتا۔۔۔ ایک، دو بار نہیں، بیسیوں بار یہ تجربہ کرکے دیکھا۔ کسی سے کچھ مانگنا۔۔۔ کسی اپنے جیسے سے کچھ مانگنا بہت برا لگتا ہے نا! اور ہے بھی غلط۔۔۔ شاید لفٹ لینے کی حد تک تو چل ہی جاتا ہو لیکن چھوٹی چھوٹی چیزیں دوسروں سے مانگنا، دوسروں کی چیزوں پر انحصار کرنا، یہ بالکل بھی اچھی عادت نہیں۔
میں نے یہی سوچتے سوچتے ٹی۔وی کھول لیا۔ خبر آرہی تھی:
امریکی کانگریس میں پاکستان کے لیے ساڑھے سات ارب ڈالر کی امداد کا بل پیش کردیا گیا۔
پھر خبر آنے لگی: یورپی یونین نے صوبائی محکمہ تعلیم کی روکی جانے والی 39 ملین یورو کی امداد بحال کردی ہے۔
امداد۔۔۔ قرضہ۔۔۔ خیرات۔۔۔ بھیک۔۔۔ ہونہہ۔۔۔ جس قوم کو اوپر سے لے کر نیچے تک بھیک کا سہارا ہو، اس میں چھوٹے چھوٹے بھکاریوں کا کیا قصور۔۔۔؟ میں نے غصہ میں ٹی۔وی بند کردیا۔
۔۔۔۔۔۔۔۔۔
پاکستان قرضہ گوگل کیا کہتا ہے؟
August 06, 2008 | صدائے عارم | 5 تبصرے »
عنبر آج یونیورسٹی نہیں جاسکی تھی۔ پٹرولیم مصنوعات کی قیمتوں میں ایک بار پھر اضافہ کے باعث کراچی میں پہیہ جام ہڑتال ہوئی تھی۔ اس نے سارا دن شاید گھر میں ٹی وی پر خبریں دیکھ کر ہی گزارا۔
“یہ آج کی ہڑتال کیوں ہوئی؟ کسے کیا ملے گا؟” 
آخر رات کو مجھ سے عنبر کا سوال ہوا۔
“کیا ہونا ہے۔۔۔ ایک، دو دن میں گاڑیوں کے کرائے بڑھ جائیں گے۔ بس!”
“اس لیے کی تھی ہڑتال؟” 
“تو۔۔۔؟”
“کتنے بے شرم ہیں نا یہ۔۔۔ 
ان کو ذرا سا بھی احساس نہیں ہے کہ عوام بے چاری کتنی پریشان ہے۔” وہ قوم کا رونا لے بیٹھی۔
“سب ہی بے حس ہیں۔۔۔ اوپر سے لے کر نیچے تک۔۔۔” میں نے بیزاری سے کہا۔
“میرا تو دل چاہتا ہے کہ پرویز مشرف کے پاس جاؤں اور اس کو زور سے تھپڑ لگاؤں۔” عنبر معصومیت سے بولی۔
“ارےےے۔۔۔ اس کا کیا قصور ہے؟”
“دیکھو نا۔۔۔ اگر اس کو ذرا سی بھی پرواہ ہوتی تو وہ کچھ کرتا نا۔۔۔”
“پر یہ پرویز مشرف کا نہیں، حکمراں جماعت کا قصور ہے نا پگلی۔”
“نہیں نا۔۔۔ اس کو چاہئے کہ وہ وزیر اعظم کو بلائے، اس سے بات کرے اس بارے میں۔۔۔ کچھ تو کرنا چاہئے نا ان کو۔۔۔!” اس نے اپنی سیاسی بصیرت کا مظاہرہ کیا۔
“اچھا چھوڑو بھی۔۔۔ یہ تمہیں سیاست میں کب سے دلچسپی ہوگئی ہے۔۔۔ بھاڑ میں ڈالو۔” میرا سیاست پر بات کرنے کا کوئی موڈ نہیں تھا۔
“عارم۔۔۔ ہمیں خود بھی کچھ کرنا چاہئے نا۔۔۔ میں سوچتی ہوں کہ جیسے ابھی دودھ کی قیمتوں میں اضافہ ہوا تو کم از کم ہم اپنے رشتہ داروں کو سمجھائیں کہ کچھ دن دودھ لینا بند کردیں، جب ان کا دودھ کوئی نہیں لے گا تو کیا کریں گے؟ پھر کم کرنی ہی پڑے گی نا قیمت۔ تب تک ڈبے کا دودھ استعمال کرلیں۔” پھر وہی معصوم سی باتیں۔
“ہاہاہا۔۔۔ یعنی اس سے بھی مہنگا دودھ؟ اچھا چلو بس۔۔۔ ختم کرو یہ باتیں۔۔۔” 
میں نے بات ختم کرنا چاہی پر اس کا ایسا کوئی ارادہ نہیں تھا۔
“ایسا کرتے ہیں ہم دونوں چلتے ہیں پرویز مشرف کے پاس، اس کو بتاتے ہیں سب کچھ۔”
“ہونہہ۔۔۔ کچھ نہیں ہونا ہے اس سے بھی۔۔۔” اور آخر، میں عارضی طور پر اپنی جان چھڑانے میں کامیاب ہوگیا۔
لیکن۔۔۔ ہماری جان ایسے چھوٹنی نہیں ہے۔ ہم نے کچھ کرنا ہے۔۔۔ حکمرانوں پر تنقید کرکے ہم اپنی ذمہ داریوں سے سبکدوش نہیں ہوسکتے۔ ایکسپریس نیوز پر “کالم کار” پروگرام آرہا تھا۔ اس میں یہ گفتگو ہورہی تھی کہ عوام کو خود بھی کچھ سوچنا چاہئے۔ پاکستان چائے برآمد کرنے والا دنیا کا تیسرا بڑا ملک ہے جہاں کے رہنے والے سالانہ چار ارب سے زائد رقم چائے پر خرچ کردیتے ہیں۔ ایسے ہی سولہ سنگھار کی زیادہ تر چیزیں درآمد کی جاتی ہیں جن پر بھاری زر مبادلہ خرچ ہوتا ہے۔ ہمیں ان سب پر قابو پانا ہے، اگر ہم اپنے وطن سے مخلص ہیں تو۔
اقبال کہہ گئے ہیں:
افراد کے ہاتھوں میں ہے اقوام کی تقدیر
ہر فرد ہے ملت کے مقدر کا ستارہ
July 23, 2008 | صدائے عارم | 7 تبصرے »
بہت دیر تک نگاہیں ایک نقطہ پر جمی رہیں، حالانکہ مجھے اس کا اندازہ قطعی نہیں ہوا۔ ذہن خالی ہو یا خیالات منتشر، بے چینی ایک ہی طرح ہوتی ہے۔ خاص کر اس پل جب کچھ لکھنے کا ارادہ کرکے بیٹھا جائے۔ آخر کافی دیر یونہی بیٹھے رہنے کے بعد میں اٹھ گیا۔ سوچا، آج کے لیے اتنی مغز ماری بہت ہے۔ آئینہ کے سامنے جاکھڑا ہوا، 6 فٹ قد۔۔۔ براؤن آنکھیں۔۔۔ چوڑا سینہ اور چہرے پر مسکراہٹ۔
مسکراہٹ۔۔۔ ہممم۔۔۔ یہ مسکراہٹ تو جیسے میرے چہرے کی پہچان ہو۔ وجہ، بے وجہ مسکراہٹ۔۔۔ زندگی کی پریشانیوں اور مسائل کو کھلا چیلنج۔۔۔ فاتحانہ انداز۔۔۔ کہ دیکھو تو سہی، یہ انسان تمہارے حملوں سے گھبرانے والا نہیں، ہمت ہارنے والا نہیں۔۔۔ ہاں، دیکھو اسے۔۔۔ یہ “عارم” ہے۔
اور یہ عارم کے بلاگ کی پہلی تحریر۔
July 21, 2008 | متفرقات | 22 تبصرے »
نوجوان کے منہ سے غیر متوقع جملہ ادا ہوا۔